କଥାନି : କରୋନା (କୋଶଲୀ/ସମ୍ବଲପୁରୀ)

-ଜୟଶ୍ରୀ ସାହୁ, ବରଗଡ଼

                                                   
 ତେଜରାତି  ଦୁକାନ  ଆଘେଁ  ୨, ୨ ମିଟର ଛାଡି  ଆଗ,ପଛ ଡେବରି, ଭୁଜନି ହେଇକରି ୬ଟା ଗୋଲ କଟା ହେଇଛେ । କିନ୍ତୁ ୩ ଲୋକ  ଏକା ସାଂଗେ  ସାମାନ ଘିନୁଛନ୍ । ମୁଇଁ  ଠିଆହେଲି  ଗୁଟେ ଗୋଲ ଭିତରେ ।ଆର୍ କିଏ ଜନେ ଭିଲ ଆର  ଗୁଟେ ଗୋଲ ଭିତରେ ଠିଆ ହେଲେ ।ଦେଖଲିଁ  ଆମେ ଦୁଇ ଝନ ଖାଲି ଠିଆ ହେଇଛୁଁ  ଗୋଲ ଭିତରେ  , ବାକି ସଭେ  ସିଧା ପୁହୁଁଚି ଯାଉଛନ୍  କାଉଣ୍ଟର ନିକେ ଆର୍  ଚିନି କେଜେ , ରାହାଡି ଦାଏଲ୍ ଅଧା, ଥିନ ଆରାରୁଟ ବିସ୍କୁଟ....... ଏନ୍ତା  ବରଗି ବସୁଛନ୍ ।  ଲଖପତି ଦାଦା ଆଏଲେ, ମତେ ନାଇଁ ଦେଖଲା ବାଗିର ସିଧା  ଦୁକାନର  ମୁହେଁ  ହାଜର । ମୁଇଁ  ପଛଆଡୁଁ ରଡଲିଁ  \" ଦାଦା ଜୁହାର \" ।

    ଭଲେ ଥା ନୁନି । ମୁହୁଁଟା ଖାପି  ନେଇଛୁ ତ, ହେଥିର ଲାଗି ଚିନ୍ହି ନାଇଁ ପାରଲି ।

      ଯେ  ? ମୁଇଁ ତମରନୁ  ଆଘୋ  ଆଇଛେଁ । ଡେଗି କରି କେନ୍ତା ପଲଉଛ  ? ଇ ଲକ୍ଷ୍ମଣ ରେଖା କାଣା ଚାଁଟି  , ମକରାମାନକର  ଲାଗି କଟା ହେଇଛେ  ?

       ଦାଦାର ସାଂଗେ ଦୁକାନିର ମୁହଁ ଭିଲ ଆମ୍ବିଲ ହେଇଗଲା । ନାଇଁ ମାନବାର ଆଗ୍ୟାଁ, କେତେ ଥର, କେତେ ଲୁକକୁଁ ମନା କରବେ  ? ହଉ ମାଡାମ କହୁନ କାଣା ନେବେ  ? ଦୁକାନି ମତେ କହେଲା ।

         ନୁନିକେ ପଛେ ଦେବ ହୋ  ! ମତେ ଆଘୋ ବଟ ତ  । ରାମାୟଣ ଟା ମିସ୍ ହେଇଯିବା ।

         ଆଘୋ  ଯିବ କାଣା । ଇହାଦେ ବହୁକେ ଫୋନ ଲଗଉଛେଁ ତମକୁ ୧୪ ଦିନତକ ଅଲଗା ରଖବେ । କିଏ ଜାନିଛେ, ଆର୍ କେନ୍ କେନ୍କେ ଯାଇଥିବ  ଯେ । ସବୁନୁ ଲେଠେଇ  , ଘେଁସରେଇ ହେଇକରି  ଘରକେ ଯାଇ କରି ବେମାରୀ ର ବିହନ ବୁନବ  , ନାଇଁ  ? ଇଥିର ଲାଗି ସରକାର ଛୁଟି  ଦେଇଛେ  ?

         ମାରି ନେଲା ରେ ବୁଆ । ତୋର ବହୁ ସତକେ  ସତ ମତେ ଢୁକି  ନାଇଁଦିଏ, ନୁନି  ! ଆଝିର  ଯେ ରାମ ସୀତାର ବିହାଘର ଅଛେ  !  
Advertisement

WANTED : Female Tele Caller(Freelance) : Qualification-Graduation. The candidates must be well conversant in Odia and Hindi language. Their voice must be sweet and audible. Interested Candidates may send their bio-data along with the contact details to : info@matrimonyind.com

Spread the love
କଥାନି : କରୋନା (କୋଶଲୀ/ସମ୍ବଲପୁରୀ)